實現夢想

信報「投資者日記」作者曹仁超先生對年青人如何實現夢想有一番的想法，希望以下節錄對同學有所啟發。
‘每個人年輕時都有夢想，但好少人可以夢想成真，點解？分別係你對「人生目標」有幾認真。為達致夢想，你必須學習某方面挑戰，你必須知道某方面知識，你必須做D事，一步步將夢想變成真，日復一日年復一年。朋友！你夢想係乜？告訴你的戀人或太太，然後遵守諾言，每天向人生目標進發。千里之行始於足下，每天花幾小時在自己夢想上，天下無難事，只怕有心人！不要空談夢想而一D事都唔去做，愈早開始愈好。夢想係目標、時間係工具。無論健康、財富與知識，只要訂下目標，再利用時間，持之以恒，少有達唔到。成功與失敗分別唔係有冇夢想，而係你願意為夢想付出幾多代價。’

善用時間才可完成夢想
　　許多人有夢想但冇時間完成，理由係唔懂善用時間。唔少人離開學校日仍有夢想，但十年後60％人忘記自己理想，理由係「俗務纏身」。如果你唔安排時間，多多時間唔夠用！離開學校二十年，能夠過自己想過生活人只剩下10％；離開學校後三十年，達致自己夢想只佔3％，點解咁少？因為破壞達致夢想事實在太多，例如：一、飲酒；二、睇電視；三、睇小說；四、行街買；五、約朋友吹水；六、諸事八卦（睇八卦周刊）；七、好管閒事；八、冇恒心一曝十寒。除睡眠、食飯、返工等，每天真正自己可以支配時間其實唔多，一般只有兩、三小時，好容易無無謂謂便浪費掉。其實，決定你將來便是如何善用每天呢兩三個鐘頭，聚沙可成塔，聚雨可成河，每天花一兩小時為自己夢想而努力，十年後可見成績，二十年後夢想已在望，三十年後通常夢想已成真！